مساء الخير يا حرامية عهد الانقاذ .. شنو حكاية بيع مستشفى امدرمان دى ؟ .. يا اخوانا حنو على البلد دى شوية .. الناس تتعالج وين تانى والمرض جائى بالكوم .. يعنى ما سمعتو بى فتة الكوارع فى مدارس الاساس ؟ ولا بى المنقة النية بالشطة ، البقت فطور وغدا ؟ ولا العدسية البقت تتباع بدل الفول ؟ لكن بينى وبينكم العدسية لما تتعمل بوش حاجة ما تخلص .. طعم وذوق .. ابداع جد ، اها دا بقى الغذاء الرئيسى لى ناس كتاااار ، يعنى شويتين زمن والناس دى عينها على المستشفيات عدل .
زمان .. ما بعيد خالص .. كنا بنقول ظهور الركشات فى شوارع الدول احدى مؤشرات الفقر .. وبعدها بى فترة بقينا نقول .. ظهور صاجات الطعمية فى الشوارع احدى مؤشرات فقر الناس .. هسة بقى العندو صاج طعمية زى العندو ركشة .. يعنى ناس مكتفين وقادرين على الرفاهية كمان .. وديل الاثنين بقى الحصول عليهم صعب المنال .
اخوتى فى الوطن حرامية عهد الانقاذ .. والله عينكم القوية دى ما عاجبانا .. لكن نعمل شنو ؟ وصلنا معاكم لى نقطة اضعف الايمان .. عشان كده .. نرجوكم ونتوسل اليكم .. اختاروا لينا واحد .. بس وااااحد من بين كل عشرة منكم يبقى لينا حرامى زى ارسين لوبين .. يحن على الناس المساكين ويديهم من البلهطو شوية .. صدقونى بتحل مشاكل كتيرة .. وبعد داك انشاء الله تلهطوا يحدى ما تنعدم اى حاجة تتلهط .. ودمتم الى يوم الزنقة والزرقة .
